Компанијата „Балкан енерџи груп“ (БЕГ), која управува со парното греење во Скопје, соопшти дека веќе нема пари да обезбеди гас за греење на скопјани и побара Владата да го преземе управувањето на системот.
„Како општествено одговорна компанија, информираме дека немаме повеќе ресурси да обезбедување финансирање на грејната сезона без државна помош за компензирање на тарифите за производство на топлинска енергија со што не ќе можеме да продолжиме со производство на топплина“, соопштија од компанијата.
Оттаму побарале Владата да го преземе управувањето со компанијата.
„За да се обезбеди непрекинато производство на топлинска енергија во ПТБЕ, предложивме Владата да ја преземе во времено управување компанијата почнувајќи од 14.01.2022, сѐ до завршување на кризната состојба во оваа грејна сезона“, се вели во соопштението, во кое БЕГ наведува дека досега со големи потешкотии успеала да го одржува системот и да набавува гас по зголемените цени.
„Во четвртиот квартал во 2021 година и покрај големиот раст на цената на природниот гас на слободниот пазар, компанијата успеа да ги амортизира пазарните ризици и обезбеди растот на цените на гасот на берзите да не се одрази врз цената на топлината која се испорачува на корисниците. На тој начин потрошувачите во првиот дел од грејната сезона воопшто не ги почувствуваа последиците од енергетската криза“, велат од БЕГ.
Со оглед на продолжувањето на енергетската криза и високите цени на гасот, од компанијата велат дека веќе не се во состојба да ги сервисираат зголемените трошоци.
„Добиваме голема помош од компанијата ТЕ-ТО АД која со своите испораки на топлинска енергија во системот ја намалува потребата за набавка на природен гас во износ од дополнителни 5 милиони евра. Владата се заложи за итно плаќање на доспеаните фактури на буџетските потрошувачи. Сепак, ликвидноста на ПТБЕ брзо се истоштува и има средства за набавка на гас до крајот на утрешниот ден. Одобрената тарифа за топлинска енергија од Регулаторната Комисија за Енергетика покрива незначителен дел од овие зголемени трошоци. Владата и нашата компанија вложија големи напори да се покрие финансискиот јаз помеѓу набавната берзанска цена на природниот гас и одобрениот трошок во тарифата за производство на топлинска енергија кој за месец Јануари 2022 година изнесува 9 милиони евра. Сепак поради постоење објективни пречки за обезбедување финансиски средства од државата, сѐ уште не е најдено решение за овој горлив проблем“, велат од компанијата.
