Портпаролот на ВМРО-ДПМНЕ, Димче Арсовски повторно изнесе документи за кои тврди дека се поврзани со скандалот со рекетот и одземање тендери во РЕК Битола. Како што вели тој, намерно сега се води фирмата „СВ Инвест“ во стечај со цел да се прикрие целиот случај и да не се поврзе со скандаот.
Фамозната фирма „СВ Инвест“ на Столе Чифлигароски, еден од луѓето кој со Вице Заев одземаше тендери на компании коишто си добиле во РЕК „Битола“, на 22 март објавила отпочнување на стечајна постапка, вели портпаролот на ВМРО-ДПМНЕ, Димче Арсовски.
Станува збор за фирма која се поврзува со случајот во кој опозицијата тврди дека од фирмата „Рубитон“ било барано да отстапи дел од добиениот тендер за „СВ Инвест“ или да плати рекет од 250 000 евра.
„Очигледно е дека сакаат оваа фирма свесно да ја затворат сите инволвирани во криминалот и да ја стават во стечај за да не ги поврзува ништо, ама баш ништо, ниту Столе ниту кој било друг со криминалот во РЕК ‘Битола’. Но, тоа се само нивни желби и тоа не оди така. Не може со затворање на фирма да се амнестираат делата доколку ги има и доколку е направен криминал, а видовме по пријавата дека ги има, на кој било инволвиран во целиот случај од пријавата, рече Арсовски.
