Пишува: ПЕТРИТ САРАЧИНИ
Прво, за најостра осуда е обидот за убиство од жител на Арачиново врз негови двајца сограѓани кај ТЦ. Бисер. Но, тоа не значи дека сите арачиновци се исти, или дека сите Албанци се насилници и убијци!
Второ, за најостра осуда е начинот на кој за овој настан извести Канал 5 на Фејсбук (но не само оваа телевизија туку и други медиуми). “Повторно „албанофобија“ од страна на ОЈО? Им ветија на арачиновци школо за пилоти, па сега ОЈО се чуди зошто возат брзо…“ – пишуваше во постот на Канал 5, кој по реакциите беше избришан од Фејсбук страницата
Вакви формулации можат да бидат сè, само не етичко и професионално новинарство! А токму на таа телевизија, пред некој ден, бев прашан зошто национализмот во земјава ни се повторува.
Трето, за осуда се и новинари и јавни личности кои ги критикуваат Канал 5 за оваа објава на Фејсбук, а во коментарите на нивните постови дозволуваат секакви гадости на адреса на оваа телевизија, но и на Македонците воопшто.
Интересно, речиси и немаше наслов во македонските медиуми во кој беше напишано дека арачиновецот е уапсен и дека за овој грозен акт добил притвор, и дека за такво дело се лежат повеќе години затвор.
Така можеби и би се обесхрабриле ваквите насилници да мислат дека може да прават што сакаат без да бидат казнети најстрого. Ама, така нема да има толку кликови и читаност на содржината, а и наапани коментари кои ќе го „бустаат алгоритамот“.
Еве ви дел од одговорот зошто етно-национализмот во земјава ни се повторува, а насилството се охрабрува и станува секојдневие и „најлесен начин“ за решавање на „проблемите“.
Секако дека највиновни за тоа се политичарите, но виновни се и дел од медиумите, а и новинарите кои дозволуваат простор за омразата, и ги злоупотребуваат ваквите настани за лична придобивка и промоција!
Извор: Ima.mk
