Министерот за надворешни работи на Бугарија, Георг Георгиев, се сретна со амбасадори и дипломати од амбасадите на земјите членки на Европската унија, САД, Канада, Обединетото Кралство и Швајцарија во Софија, јавува 24 часа, пренесува Трибуна.
На средбата дипломатите беа детално запознаени со, како што посочуваат од бугарското Министерство за надворешни работи, засилувачките тенденции на институционална репресија врз бугарската заедница во Република Северна Македонија.
„Во тој контекст се одржа отворена и искрена дискусија со Љупчо Ѓоргиевски претседател на затворениот од властите во Скопје Културен клуб „Иван Михајлов“ – Битола, наведуваат од бугарското МНР.
Георгиев ја потврди последователната поддршка на бугарската држава кон Ѓоргиевски и ја нагласи позицијата на Бугарија, која ја оценува како целосно неприфатлива осудителната пресуда изречена на 12 јуни годинава од Основниот суд во Битола.
Според бугарските власти, предметот и пресудата против Ѓоргиевски претставуваат политички мотивиран процес, кој не одговара на земја кандидат за членство во ЕУ, која тврди дека е пример за функционална демократија.
„Бугарските институции остануваат континуирано ангажирани во гарантирањето на правата на Бугарите во Северна Македонија, вклучително и со користење на сите меѓународни механизми во областа на човековите права“, додаваат од МНР во Софија.
Министерот Георгиев неодамна истакна дека нарушувањата на правата на граѓаните со бугарска самосвест во Северна Македонија потврдуваат дека постои сериозна потреба од ефикасен механизам за правна заштита.
