Алијанса за Албанците формира Привремен координациски совет за да нема конфузии во јавноста по, како што велат, едностраните дејствија на претседателот на партијата, Арбен Таравари. Од таму велат дека одлучено е да се формира нов претставнички тим кој официјално ќе ја претставува Алијансата за Албанците во сите структури и процеси на одлучување во коалицијата „Влен“.
„Во контекст на последните случувања во партијата, чувствуваме обврска да ја информираме јавноста и членството на Алијансата за Албанците во врска со ситуацијата која настана како резултат на едностраните дејствија на претседателот на партијата, Арбен Таравари. Овие повторувани постапки, кои се преземени надвор од статутарната рамка на партијата и без консултација со надлежните органи, предизвикаа голема конфузија , не само меѓу мнозинството членови на Алијансата за Албанците, туку и во пошироката јавност“, велат од АА.
Соочени со ова наметната ситуација, додаваат од партијата, и со цел да се обезбеди демократско и статутарно функционирање на партијата, огромното мнозинство на членството и ограноците на Алијансата за Албанците, на состанокот одржан вчера, донесоа одлука за формирање на Привремен Координациски Совет, кој ќе дејствува сè до разјаснување и стабилизирање на актуелната состојба во партијата.
„На овој состанок, Координацискиот Совет ги донесе следните важни одлуки:
1. Избор на координатор на советот
За координатор на Координацискиот Совет е избран г. Арбен Фетаи, Претседател на Собранието на Алијансата за Албанците.
2. Став по однос на коалицијата „Влен“
Алијансата за Албанците ќе продолжи да биде дел од Владата во рамките на коалицијата „Влен“ како рамноправен партнер со пропорционално претставување во однос на другите партии во коалицијата.
3. Претставување во рамките на коалицијата „Влен“
Одлучено е да се формира нов претставнички тим кој официјално ќе ја претставува Алијансата за Албанците во сите структури и процеси на одлучување во коалицијата „Влен““, се наведува во соопштението.
Од Алијансата велат дека овие мерки се преземени со цел зачувување на интегритетот на партијата, почитување на волјата на мнозинството и обезбедување на демократско и транспарентно функционирање на Алијансата за Албанците.
Текстот Алијанса за Албанците формира Привремен координациски совет за да нема конфузии во јавноста е превземен од МАКФАКС.
