Вицепремиерката задолжена за политики за добро владеење, Славица Грковска, денеска имаше состанок со претседателот на Државниот совет на Италија и поранешен еврокомесар за правда и безбедност, Франко Фратини, на кој се разговараше за можностите за меѓусебна соработка, особено во делот на добрите практики кои Италија ги има во креирањето на антикорупциските политики, унапредување на регулативата за јавните набавки, како и политиките за добро владеење воопшто.
Како што соопшти владината Грковска се заблагодари на поддршката што Италија и ја дава на Северна Македонија, како во евроинтеграцискиот процес, така и на експертско и техничко ниво и ги презентираше најзначајните столбови на нејзиното работење, а тоа се политики за поголема ефикасност и транспарентност на државните институции, дигитална трансформација на општеството, како и креирање на антикорупциски политики.
Претседателот Фратини ги поздрави резултатите што Владата на Северна Македонија ги постигна во делот на транспарентноста, но и реализацијата на сите реформи кои овозможија нашата држава да биде на чекор до добивање датум за преговори за членство во Европската Унија.
– За мене и за мојот Кабинет е важно искуството што Италија го има во креирањето и имплементирањето на антикорупциските политики. Јас се залагам за долгорочни, одржливи решенија, но и да испорачаме ефикасни резултати. Според првичните анализи, иако имаме релативно нов Закон за јавни набавки кој обезбедува висок степен на транспарентност, неопходни се одредени интервенции кои ќе ја зголемат конкурентноста и ќе ги отстранат сите можности манипулации, рече вицепремиерката Грковска.
Претседателот Фратини нагласи дека во моментов Италија работи на ново законско решение за јавни набавки, во кое ќе биде вклучен и постојниот модел – ефикасен алгоритам кој ги евалуира стандардите во сите јавни набавки и алармира доколку утврди одредени нелогичности.
– Одговорна за оваа дигитална електронска платформа е италијанската Антикорупциска комисија. Во духот на пријателството и соработката меѓу Италија и Северна Македонија со задоволство ќе го споделиме искуството и начинот на примена на ова решение, рече Фратини.
Тој додаде дека, Италија како претседавач на Европската мрежа на членови на претседатели на врховни и управни судови на земјите членки на ЕУ ја отвора можноста на овие состаноци да присуствуваат, како набљудувачи, и претседателите на врховните и управните судови на земјите кандидатки за членство во ЕУ.
Двајцата соговорници оценија дека чекорите за реализација на овие две прашања можат да почнат веднаш и изразија подготвеност да ја продлабочат соработката и во други општествени сфери, кои се важни за транспарентно, професионално и одговорно владеење, стои во соопштението на владината прес-служба.
