Северна Македонија е лидер во Европа според бројот на жени истражувачи кои имаат учество од 53 отсто во вкупниот број на истражувачи во државата и тоа е потврдено во последниот објавен извештај на УНЕСКО, истакна министерот за образование и наука Јетон Шаќири на денешната конференција организирана од страна на сопругата на претседателот на државата, Елизабета Ѓорѓиевска, а по повод 11 февруари, Меѓународен ден на девојките и жените во науката, на која учествуваа и повеќе други претставници од државата и од регионот.
Тој им честита на сите млади девојки и жени од овие простори кои одлучиле да се занимаваат со наука. Тие, посочи министерот, се значаен столб на кој се потпира севкупниот општествено економски тек и напредок, а секако имаат и придонес кон глобалниот развој,
Потенцира дека жените научнички заслужуваат посебна почит од општеството, особено од институциите на системот кои мора постојано да им овозможуваат што подобри услови и можности за работа и нивниот труд соодветно да биде вреднуван, како мотив за дополнителни заложби.
– Владата токму тоа и го прави. Само во изминатата календарска година преку јавни повици, околу 243 милиони денари буџетски средства беа доделени за да се поддржи реализацијата на научно – истражувачки проекти од посебен јавен интерес кои ги спроведуваат јавните научни установи, како и за подобрување на условите за работа во лабораториите на јавните високообразовни и научни установи, рече Шаќири.
Нагласи дека стимулативна мерка за создавање нови научници се и стипендиите за втор и трети циклус на студии во државата, првите вратени по 10-тина години откако беа укинати, а вторите, тие за докторски студии се воведени за прв пат. Тој изрази уверување дека трендот на постојан раст на буџетот за наука ќе продолжи и во иднина.
Посочи дека Северна Македонија ќе продолжи и во иднина да учествува во глобалното одбележување на овој ден, затоа што оваа иницијатива на Обединетите нации ја сензибилира родовата еднаквост и ја истакнува подготвеноста на жените да дадат придонес кон научната дејност. Додаде дека неодамна државата ја поддржа и Љубљанската декларација за родова еднаквост во истражување и иновации.
Меѓу поддржувачите на конференцијата е и општина Чаир, чиј градоначалник Висар Ганиу порача дека зајакнувањето на улогата на жената, особено во науката, е иднината на државата. Тој, како што соопштија од општината, навел дека учеството на жените во науката треба да се гледа како достигнување и неопходност за целото општество.
-Жените се главниот столб на семејството, тие се мајки, сопруги, сестри, зошто да не бидат и главниот столб на државата во областа на науката, научното истражување, научните откритија, бидејќи жената е всушност раката што го движи човештвото. Нема да одам предалеку за да давам примери, ќе застанам кај нашата прекрасна општина Чаир од каде што доаѓаат многу успешни жени и девојки од различни гранки на медицината, информатиката, општествените науки каде што има стотици професорки кои денес се пример за сите. Каде што има 11 едукативни и образовни институции, додека седум од нив ги водат докажани жени со многу силен багаж. Причината поради која нагласувам кој ги води овие институции е дека од тука потекнуваат научниците на нашата иднина, рече Ганиу.
Тој нагласи дека ако на детето од првите чекори му се даде пример како треба да биде положбата на жената во општеството, дека жената не треба да се занимава само со домашните работи, туку дека може да биде научник, претседател, пратеник, професор, директор, адвокат, лекар, геодет или архитект, тоа општество никогаш нема да пропадне.
