Најсилното екипно шаховско натпреварување, Европскиот Клупски Куп, по едногодишна пауза, оваа година се одржува од 17 до 24 септември, при тоа, повторно после 2015 ќе биде на “наш терен” во Струга.
Во 2016 година ШК Алкалоид го освои Европскиот Клупски Куп и ја понесе титулата Европски Шампион! Европското клупско злато беше освоено во годината кога клубот одбележа 40 години од своето формирање. Во 2017 година ШК Алкалоид продолжи со успешен настап на Европскиот Клупски Куп и од Анталија (Турција) се врати со сребрениот медал.
За 2021 година клубот е подготвен за настап со неколку промени во својот машки состав. Новина е фактот дека ШК Алкалоид за првпат ќе учествува на Европскиот Клупски Куп за жени со своја екипа.
Предводник на екипата е еден од најсилните светски шахисти, Велемајсторот Shakhriyar Mammadyarov (Азербејџан) кој настапуваше за Алкалоид во 2007, 2008, 2009 и 2019 година. Рангиран моментално на шестото место на Светската рејтинг листа, еден од ретките шахисти кои ја поминале границата од 2800 рејтинг поени. Познат е и омилен на шаховската јавност по својот бескомпромисен и динамичен стил на игра. Оваа година на елитниот турнир “Superbet Chess Classic” кој што се одржа во Јули 2021 во Романија, во конкуренција на најсилните светски шахисти го освои првото место.
Велемајсторот Yuriy Kryvoruchko (Украина) од странските појачувања досега има најмногу настапи за Алкалоид на Европскиот Клупски Куп, на вкупно 5 настапи има одиграно 34 патии со мошне висок (74%) резултат, односно освоени 25 поени.
По успешниот настап во 2019 година, повторно во екипата на Алкалоид е Шампионот на САД за 2018 година Велемајсторот Sam Shankland, кој со репрезентацијата на САД беше и освојувач на златен олимписки медал во 2018 година. Во 2021 година зад себе има неколку успешни турнири, победа на силниот затворен турнир “Prague Masters” освојувајќи 5,5 поени од 7 партии. На неодамна завршениот Светски Куп 2021 стигна до четврт-финалето каде што по долга борба изгуби од поранешниот предизвикувач на Светскиот првак Сергеј Карјакин.
Повторно во екипата е Велемајсторот Ernesto Inarkiev (Rusija), Европски шампион во поединечна конкуренција од 2016 година, кој за Алкалоид настапи досега на два Европски Клупски Купови и тоа 2008 и 2019 година.
За првпат во екипата на ШК Алкалоид ќе настапат:
– Велемајсторот Daniil Dubov (Русија), со светска шампионска титула во забрзан шах во 2018 година – освојувајќи го трофејот пред елитните Велемајстори Магнус Карлсен (светскиот шампион од Норвешка), Шахријар Мамедјаров и Хикару Накамура (САД). Дваесет и пет годишниот Дубов важи за еден од најкреативните шахисти, честопати со победи во прекрасен стил.
– Велемајсторот Alexandr Predke (Русија), 27-годишен претставник на истата најсилна руска шаховска школа шахисти кој ќе ја засили оваа година екипата на Алкалоид.
Во составот на ШК Алкалоид се македонските стандардни државни репрезентативци и повеќекратни државни шампиони, Интернационален мајстор Филип Панчевски и, велемајсторот Трајко Недев. Капитен на екипата е Велемајсторот Драгољуб Јаќимовиќ. Со освежен состав, искусните фармацевти ќе ја продолжат и оваа година спортската битка за европскиот врв.
На Европскиот Клупски Куп оваа година се пријавени 38 екипи, меѓу кои како конкуренти за највисок пласман ќе бидат Mednyi Vsadnik (Русија) – шампиони од 2017 година, Novy Bor (Чешка) – второпласирани 2018 година, KPRF (Русија) – вообичаено со мошне силен состав, Offerspill Chess Club (Норвешка) – со светскиот шампион Магнус Карлсен на првата табла. Во секој случај се очекува рамноправна и до крај неизвесна борба за подобар пласман и освојување на медали.
На Европскиот Клупски Куп во женска конкуренција, оваа година има релативно мал број екипи (само 8), но како и во минати години голем дел од врвните шахистки се членови на екипите што ќе се борат за највисок пласман и тоа: Monte Carlo – повеќекратен освојувач на Европскиот Клупски Куп (со Aleksandra Goryackina која беше 2020 предизвикувач на светската првенка); GRECO Kyiv (Украина) – со елитните шахистки сестрите Muzycuk Ana (светска шампионка) и Marija (предизвикувачка и еднакво силна); а секако и најдобрата руска екипа South Ural.
ШК Алкалоид во својот прв настап е рангиран во стартната листа према просечен рејтинг ва средината на табелата. Во својот состав ги има: Интернационалните мајстори Polina Shuvalova (Русија) – најдобра светска јуниорка до 20 години, потоа Ekaterina Atalik (Турција) со Irina Bulmaga (Романија) кои веќе настапија за победничката екипа на Алкалоид на неодамна завршеното екипно државно првенство за жени. Покрај нив, ќе настапат најдобрите македонски шахистки, долгогодишни државни репрезентативки: женски ФМ Моника Стојковска и женски ИМ Габриела Коскоска.
