Крцкавата коричка им дава посебен изглед и неверојатен вкус на кашкавалот, месото и на зеленчукот. Похувањето има заштитна улога, односно го сочувува квалитетот на состојките.
Похувањето е претходна кулинарска обработка на производот пред пржење, со помош на брашно, лебни трошки и други видови производи за похување. Тоа овозможува да се сочуваат свежината и сочноста на производот, истовремено давајќу му нов изглед, мирис и вкус. Најчесто за оваа постапка се користат лебни трошки, јајце со млеко и брашно, но некогаш може да се комбинира наместо обично да се стави пченкарно, оризово или брашно од хелда.
Пред да ја похувате храната, прво исушете ја од вишокот вода, па потопете ја во смесата од јајца и потоа во лебни трошки или друга смеса за похување. За подебела кора се прави двојно или тројно похување, кога производите се натопуваат во јајце, брашно, лебни трошки, па постапката се повторува уште еднаш или два пати. Ова е добро при похување сладолед, затоа што дебелата коричка ќе оневозможи да се стопи и излее сладоледот. Секогаш кога похувате, пржете на висока температура во добро загреано масло, за да не впијат масло и за да се создаде крцкава коричка.
Додајте рендан зеленчук
Вкусот можете да го дополните со додавање нетрадиционални додатоци какви што се мелени јаткасти плодови, рендан морков или тиквички. За да додадете рендан зеленчук во смесата за похување треба претходно да ги исушите во рерна, на тивко, потоа крупно да ги изрендате.
Некогаш се користат овесни или пченкарни снегулки за похување, кои на храната ѝ даваат дополнителна крцкавост и посебен изглед. Прво треба секое парче месо или зеленчук да се извалка во брашно, па јајце и на крај во овесни или во пченкарни снегулки. Ако ги користите вторите, пред похување малку истолчете ги да добиете поситни парчиња, но внимавајте да не претерате и ги претворите во брашно.
Похување со гриз
Пилешкото месо, морските плодови и карфиолот ќе добијат неверојатен вкус ако ги похувате со гриз. Прво валкајте ги парчињата во брашно, потоа во јајце или масло и на крај посипете ги со гриз, за да се создаде рамна површина без вдлабнатини. За смесата густо да ги обвие состојките, треба да користите смеса од јајца и млеко. Само јајце може да користите за производи што имаат висока влажност. Воедно оваа смеса овозможува поврзување на смесата за похување со основите состојки. Добар сооднос на смесата е две јајца со 50 мл свежо млеко. Може во млекото да додадете само жолчки и да ги похувате парчињата храна додека добијат златно-жолта боја, а ако додадете само белки, месото или рибата ќе изгледаат нежно и префинето.
Пивска смеса
Похувањето со смеса од пиво ги прави производите посебно вкусни и крцкави. За да ја приготвите оваа смеса, треба да изматите јајце, да му додадете една чаша пиво, сол по вкус, црн пипер, лук во прав и малку црвен пипер (можете и лут, ако сакате пикантна храна). Потоа во добро измешаната смеса додајте брашно и изматете додека добиете хомогена смеса. Пред похување напрскајте ги со малку вода производите, потоа извалкајте ги во брашно и на крај во смесата со пиво, па пржете ги во тава со добро загреано масло. При овој начин на похување, оставете по 2-3 сантиметри растојание меѓу парчињата храна за да не се залепат. Овој начин на похување е посебно добар за пилешко месо. На крај оставете ги готовите парчиња месо на парчиња кујнска хартија за да се впие вишокот маснотија.
