Добротворната организација Стоп ВЕО тврди дека дисциплинирањето на децата со испраќање во агол може да се смета за насилна казна. Француска организација која се бори против насилството врз децата започна кампања за промена на упатствата на Советот на Европа кои им препорачуваат на родителите да ги испраќаат непослушните деца на таканаречен тајм-аут.
Многу родители ќе испратат непослушно дете во агол или во соба за да се смири и да размисли за неговите постапки. Но, според „Тајмс“, „Стоп ВЕО“ тврди дека на децата им треба друштвото на нивните родители наместо да бидат пуштени сами. Затоа бараат да се сменат насоките кога се во прашање ненасилните дисциплински методи.
Сегашните упатства наведуваат дека родителите треба да „одговорат на недоличното однесување со објаснување и, доколку е потребно, ненасилни казни како тајм-аут, намален џепарлак и слично“.
Целта на тајм-аутот е да се добие време за ладење
Тајм-аут е препорачан и од Центрите за контрола и превенција на болести (ЦДЦ) во САД, кои велат дека оваа форма на казнување „обезбедува оладување и на родителите и на детето“. ЦДЦ ги советува родителите да му објаснат на своето дете зошто ги праќаат на тајм-аут и да не дозволуваат некој друг во домот да разговара со нив за тоа време.
Но, поборниците на кампањата „Стоп ВЕО“, вклучително и детскиот психолог Агнес Флорин и авторката на неколку книги за родителство Кристин Шул, веруваат дека испраќањето дете на тајм-аут е „мерка за исклучување“.
„Да се испрати детето во ќош може да се остави впечаток дека детето ве слуша. Бескорисно е. Детето нема да разбере што згрешило“, го цитираат медиумите зборовите на Флорин.
За некои, идејата за забрана на тајм-аут е прекумерна
Во 2019 година, некои детски психолози изразија загриженост дека тајм-аутот е штетен за децата, особено ако вклучува прекинување на контактот со другите во домот. Професорот по психијатрија, д-р Даниел Зигел, тогаш рече дека тајм-аутот промовира остра казна и социјална изолација.
Од друга страна, Џорџ Холден, претседател на Катедрата за психологија на Јужниот методистички универзитет, смета дека идејата за забрана на тајм-аутите е прекумерна.
„Сигурно има доста истражувачка литература што покажува дека тајм-аутот може да биде ефикасен во менувањето на проблематичното однесување“, рече тој.
