Утре се одржуваат парламентарни избори во Унгарија, а најновата анкета покажува водство на опозициската десноцентристичка партија Тисза пред владејачката коалиција Фидес-КДНП на премиерот Виктор Орбан.
Според истражувањето на агенцијата AtlasIntel, Тисза има поддршка од 52 проценти од гласачите, додека Фидес-КДНП добива 39 проценти. Тоа претставува пад од 15 процентни поени во споредба со изборите во 2022 година. Крајната десничарска партија „Нашата татковина“ има пет проценти, а Демократската коалиција два проценти.
Просекот на анкетите исто така укажува на силен раст на Тисза – од 18 проценти во 2024 година до 49 проценти во 2026 година. Поддршката за Фидес-КДНП во просек е 41 процент.
AtlasIntel е меѓународна агенција за истражување на јавното мислење, позната по користење дигитални методи и релативно прецизни предвидувања, особено во САД и Латинска Америка.
Изборите се сметаат за пресвртни и внимателно се следат од ЕУ, САД и Русија. Се очекува дека Орбан би можел да ја изгуби власта по 16 години во корист на проевропската партија Тисза, предводена од неговиот поранешен сојузник Петер Магјар.
Унгарските гласачи ќе избираат 199 пратеници – 106 во изборни единици и 93 од национални листи. Етничките Унгарци во странство имаат право да гласаат по пошта за партиски листи, а речиси половина милион се регистрирани за овие избори.
Бирачките места ќе бидат отворени од 6 до 19 часот во недела, а првите резултати се очекуваат доцна навечер. По изборите, претседателот Тамаш Сулјок треба да го свика новиот парламент во рок од 30 дена, а премиерот се избира со просто мнозинство.
Фото:Депозитфотос
Текстот Утре избори во Унгарија, анкетите покажуваат водство на опозицијата е превземен од МАКФАКС.
