Британскиот премиер, Кир Стармер, изјави дека Доналд Трамп нема одржлив план за војната во Иран и им рече на пратениците дека Обединетото Кралство не може директно да се вклучи во конфликтот на Блискиот Исток без добро осмислен пристап од САД и Израел, објави „Телеграф“.
Трамп го критикуваше Стармер за тоа што одби да се придружи на нападите врз Техеран во текот на викендот и за тоа што првично не им дозволи на САД да користат британски воени бази за бомбардирање на иранскиот режим.
Премиерот подоцна попушти и им дозволи на Американците да ги користат базите за одбранбени цели, во време кога Иран лансираше ракети и беспилотни летала низ целиот регион.
За време на редовниот „час со премиерот“, кога Кеми Баденок го праша зошто не ги овластил Британските воздухопловни сили (RAF) да преземат офанзивни дејствија против Иран, Стармер одговори: „Во саботата не бев подготвен да го воведам Обединетото Кралство во војна освен ако не бев задоволен дека постои правна основа и одржлив и добро осмислен план. Сè уште стојам зад тој став.“
Високи претставници на Конзервативната партија и Реформа на Велика Британија го обвинија Стармер дека ги загрозува „специјалните односи“ меѓу Велика Британија и САД.
Трамп синоќа изјави дека Стармер „не е Винстон Черчил“. Сепак, премиерот ги отфрли критиките. „Британските борбени авиони соборуваат беспилотни летала и ракети за да ги заштитат американските животи на Блискиот Исток, во нашите заеднички бази. Ова се посебни односи на дело. Секојдневно споделуваме разузнавачки информации за да ги заштитиме нашите нации. Ова се посебни односи на дело. Слепото држење до најновите изјави на претседателот Трамп не се посебни односи на дело“, рече Стармер.
фото/Depositphotos
Текстот Стармер: Трамп нема одржлив план за војната во Иран е превземен од МАКФАКС.
