Настапот на најдобриот светски тенисер Новак Ѓоковиќ на претстојниот грен-слем турнир Австралија Опен сè уште е неизвесен.
Ѓоковиќ речиси деценија ипол е владетел на грен – слем турнирот во Мелбурн, на кој за прв пат триумфираше во 2008 година, а вкупно го има освоено девет пати.
Организаторите на турнирот, закажан од 17 до 30 јануари, снимија два промотивни видеоматеријали, и иако Ѓоковиќ поради сите успеси во Мелбурн би требало да биде „главниот актер“, српскиот тенисер воопшто не се појавува во ниту еден од двата промотивни материјали.
Сите тенисери, кои ќе настапат во Мелбурн, мораат да бидат вакцинирани против коронавирус, а Ѓоковиќ за цело време на пандемијата беше еден од најжестоките критичари за вакцинирање на тенисерите.
Неодамна на новинарско прашање дали ќе учествува на првиот календарски грен-слем турнир во 2022 година, Ѓоковиќ кратко одговори: „Ќе видиме“.
