Генералниот секретар на НАТО Марк Руте денеска на панел во рамките на Светскиот економски форум во Давос изјави дека американскиот претседател Доналд Трамп е „во право“ и дека Европа троши премалку за одбрана.
„Тој (Трамп) е во право дека проблемот не е во САД. Проблемот е Европа. Делумно поради него, го видовме ова подобрување во однос на трошењето на европската страна на НАТО. Проблем број еден е што ние сè уште не сме на два проценти од БДП во одвојувањето за одбрана“, рече Руте на панелот „Украински појадок“.
Како друг проблем тој посочи дека „два проценти не се ни приближно доволни“. НАТО претходно постави цел да троши 2 отсто од БДП за одбрана, а Трамп неодамна изјави дека земјите од НАТО треба да потрошат пет отсто од бруто домашниот производ.
Некои официјални лица и аналитичари веруваат дека предлогот на Трамп од пет проценти е намерно висок за да започнат преговорите и очекуваат договорот да биде околу три проценти. „Сега сме безбедни, но НАТО нема да може колективно да се брани за четири или пет години ако останеме на два отсто“, истакна Руте.
Тој додаде дека неговиот претходник Јенс Столтенберг започнал процес кој ќе заврши во мај или јуни оваа година, „до кога ќе одлучиме што точно ни треба во однос на капацитетот“.
„Сите (земји-членки) кои не се на два проценти мора да достигнат два проценти во следните неколку месеци. Не можеме повеќе да чекаме, а потоа мораме колективно да го засилиме. Ќе одлучиме за точниот број подоцна оваа година, но тој ќе биде значително поголем од два“, најави Руте.
Текстот Шефот на НАТО: Трамп е во право, Европа е проблем е превземен од МАКФАКС.
