Украинскиот Генералштаб објави дека руските сили претрпеле значителни загуби во воздухопловството во неодамнешните напади со беспилотни летала – вкупно 41 воен авион, вклучувајќи стратешки бомбардери со долг дострел.
Оваа бројка се базира на последователна анализа и верификација на податоци од повеќе извори, според соопштението објавено денес.
Нападите беа извршени во текот на викендот врз неколку воздухопловни бази низ Русија, вклучувајќи локации длабоко во Сибир, а украинската безбедносна служба SBU тврди дека во операцијата биле користени беспилотни летала кои биле транспортирани стотици километри низ руска територија.
Целите биле бомбардерите Ту-95, Ту-160 и Ту-22М3, кои Русија редовно ги користи за лансирање крстосувачки ракети врз украинските градови и енергетската инфраструктура.
Москва досега призна штета на „неколку авиони“, додека проруски извори наведоа бројки за погодени помеѓу 10 и 13 авиони. Сепак, доколку украинските бројки се покажат како точни, тоа би бил најмоќниот удар врз руската стратешка авијација од почетокот на војната.
Русија, за потсетување, денес постави нов услов за продолжување на преговорите, вклучувајќи го и барањето Украина да ги прекине нападите врз воените воздухопловни бази.
