Олена Зеленска, првата дама на Украина, во интервју за Вог, за првпат јавно проговори за животот под опсада и за, според неа, клучната грешка што ја направил рускиот претседател, Владимир Путин.
Запрашана како успева да ги издржи личните и граѓанските чувства, таа вели: „Војната веднаш ги спои личното и јавното. И ова е веројатно кобната грешка на тиранинот кој нѐ нападна. Сите ние сме прво Украинци, а потоа се останато“.
Говорејќи дека Путин сака да ја подели Украина и да создаде внатрешна конфронтација, Зеленска тврди дека тоа е „невозможно да се направи со Украинците“.
„Кога еден од нас е мачен, силуван или убиен, чувствуваме дека сите сме мачени, силувани или убиени“, продолжи таа.
„Не ни треба пропаганда за да почувствуваме граѓанска свест и да се спротивставиме. Токму тој личен гнев и болка, кои сите ги чувствуваме, веднаш ја активира жедта за дејствување, отпорност на агресијата, одбрана на нашата слобода“, додава Зеленска.
Иако Зеленска првично се надеваше дека ќе остане покрај Зеленски, таа и нејзините деца добија наредба да се преселат на што е можно побезбедно место во земјата бидејќи канцеларијата на претседателот се користеше како воен објект.
Таа продолжи да ги опишува ужасите на руската воена акција, истакнувајќи ги Мариупол, Буча и десетиците деца убиени од фрагменти од гранати во нивните родни места.
„Не можам ни да го опишам. Тоа ме прави без зборови“, рече таа. „Но, неопходно е да се погледне во тоа“.
