Унгарскиот премиер Виктор Орбан воведе втора вонредна состојба во земјата, овој пат за отстранување на последиците од војната во Украина, додека првата вонредна состојба поврзана со пандемијата на коронавирус истекува во вторник следната недела, јавуваат новинските агенции.
„Светот е на работ на економска криза. „Унгарија мора да остане настрана во оваа војна и да ја заштити финансиската сигурност на своите семејства“, објави унгарскиот лидер на Фејсбук, пренесува Франс прес.
Орбан, кој го освои својот четврти последователен мандат на 3 април, претходно користел извршни наредби за да ја спречи миграцијата, а потоа и во пандемијата на коронавирус, пренесува Ројтерс.
Новата вонредна состојба повторно ќе и овозможи на владата на Орбан да усвои итни мерки, без парламент.
„Користејќи го своето уставно право, владата од полноќ прогласува вонредна состојба поради војната“, додаде тој.
Непосредно пред ова соопштение, новоположениот парламент го измени уставот за да овозможи воведување на ваква мерка „поради конфликт“. Таму партијата Фидес на Виктор Орбан има двотретинско мнозинство.
Првите одлуки донесени во оваа нова законска рамка ќе бидат објавени во среда, рече Орбан.
Орбан, кој е на власт во последните 12 години без прекин, западните партнери редовно го обвинуваат за злоупотреба на моќта во неговата земја, членка на ЕУ и НАТО, пренесе Н1.
