Францускиот Лион треба итно да заработи 130 милиони евра ова лето, објави Радио Монте Карло, во спротивно му се заканува црно сценарио поради непочитување на финансискиот фер-плеј. Лошите резултати се причината поради која Лион се најде во ваква ситуација. На почетокот на сезоната Лион го планираше својот буџет со вклучена заработка од пласманот во Лигата на шампионите преку првенството, а сега е јасно дека тоа нема да се случи.
Лион веројатно нема да избори место во европските купови. Новиот газда Џон Текстор, кој го презеде клубот од Жан Мишел Ола, има многу тешка задача пред себе. Тој летово ќе мора да ги подмири 130 милиони евра што му недостигаат на Лион, а доколку не успее, го чека серија казни од кои најтешка е можно исфрлање од лигата.
Постојат два начини на кои Лион може да ги врати споменатите пари. Една од нив е тоа да се направи со продажба на неколку играчи, пред се Рајан Черки (19), Кастело Лукеба (20) и Бредли Баркола (20). За овие талентирани играчи постои голем интерес.
Вториот, поверојатен, е продажбата на дел од сопственоста на мегауспешната женска екипа на Лион.
