Од денеска почна пријавувањето за вакцинација од сезонски грип преку страницата vakcinacija.mk. Со пополнување на формата граѓаните може да се регистрираат за вакцинација директно во системот Мој Термин.
Согласно распоредот предвиден во планот за вакцинација, по пат на смс ќе добиете информација за точниот датум и час кога треба да се вакцинирате на пунктот кој ќе го изберете при регистрацијата, велат од Министерството за здравство.
Министерството за здравство и оваа година набави 40.000 дози четиритипни вакцини против сезонски грип за следните ризични групи: стари лица (над 65 години), лица со хронични заболувања, здравствени работници, бремени жени и децата на возраст од 6 месеци до 5 години.
Трета година по ред вакцината за овие групи граѓани е бесплатна.
Поради зголемената побарувачка на вакцини против грип на глобално ниво, се прават напори количините на вакцини да пристигнат во што побрз рок. Нагласуваме дека не е доцна, граѓаните да се вакцинираат против грип во ноември или декември, бидејќи согласно епидемиолошките податоци, оваа болест во последните десетина сезони го достигнува пикот кон крајот на месец февруари, велат од Министерството за здравство.
Вакциницијата против грип не штити од Ковид 19, но истата е многу значајна во услови на пандемија со Ковид 19 и влијанието на здравствениот систем.
Во состојба на олабавување на рестриктивните мерки кога се враќаат социјалните контакти и патувањата се зголемува ризикот од ко-циркулација на Ковид 19 и грип. Со тоа може да очекуваме оптоварувањето од сезонскиот грип да биде надополнето со оптоварувањето од Ковид 19, сметаат од МЗ.
Според епидемиолошки анализи во моментов, активни случаи на ковид-19 има 7.131 од кои во Скопје – 3467, Куманово – 442, Велес- 337, Прилеп – 327 и Битола – 311.
Ризичните групи за грип, се истите кои се под најголем ризик и од Ковид 19, поради што се препорачува вакцинација против грип на истите. На тој начин ќе се избегне и дополнително оптоварување на здравствениот систем, бидејќи лицата заболени од грип би се хоспитализирале во ковид центрите.
Опфатот со вакцинација со една доза вакцина, на полнолетната популација е 57 отсто, а со две дози опфатени се 46 отсто од граѓаните над 18 години.
Republika.mk – содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.
