Косовскиот премиер Албин Курти синоќа се сретнал со дипломатските претставници на земјите од таканаречената КВИНТА – петте најголеми западни сојузници на Косово акредитирани во Приштина – и на Европската Унија, со кои разговарал за барањето на официјален Белград до ОБСЕ да се одржи гласање на косовска територија за српските парламентарни избори, јави дописникот на МИА од Приштина.
Како што соопшти службата за информирање на Владата на Косово, Курти на средбата рекол дека за ова прашање веќе ја информирал ОБСЕ дека е неопходен меѓудржавен договор за организирање на гласањето надвор од Канцеларијата за врски на Србија во Приштина и дека барањето за таков договор мора да дојде од официјален Белград како заинтересирана страна.
– (Премиерот Курти) изрази жалење за недоволната подготвеност на Србија за договор што ќе им овозможи на граѓаните на Република Косово кои имаат и српско државјанство да учествуваат на изборите според најдобрите европски меѓудржавни практики за гласање од странство, се вели во соопштението на Владата во Приштина.
Парламентарните избори во Србија се закажани за 17 декември оваа година.
Во минатото, по прогласувањето на косовската независност во 2008 година, со асистенција на меѓународната заедница, им се овозможуваше на косовските Срби да гласаат на избирачките процеси во Србија, меѓутоа таа пракса се прекина по доаѓањето на власт на Курти во февруари 2021 година.
Косовските Срби, од тогаш, немаа можност на косовска територија да гласаат за српскиот референдум во јануари 2022 година и за вонредните избори во април истата година, затоа што Курти постави услов Србија да достави официјално барање за такво нешто до Република Косово.
