Кинескиот претседател Шји Џјинпинг во Виетнам ја започна една недела посети на Југоисточна Азија, сигнализирајќи ја посветеноста на Пекинг на глобалната трговија, токму во моментот кога американскиот претседател Доналд Трамп ја разбранува глобалната економија со најновите тарифи.
Иако Трамп ги паузираше новите царини за голем број земји, тој ги остави оние за Кина, втората по големина економија во светот, на 145 отсто.
Посетата на Шји ѝ овозможува на Кина да ѝ покаже на Југоисточна Азија дека е одговорна суперсила за разлика од тоа како САД под претседателот Доналд Трамп се претставуваат пред светот, рече Нгуен Как Гианг, истражувач во Институтот ISEAS Јусоф Исак во Сингапур.
Кина може да работи на зајакнување на сојузите и изнаоѓање решенија за високата царинска бариера што САД ја постави на нејзиниот извоз.
„Нема победник во трговска војна или тарифна војна“, напиша Шји во текст објавен во виетнамските и кинеските официјални медиуми.
„Нашите две земји треба цврсто да го заштитат мултилатералниот трговски систем, стабилните глобални индустриски и снабдувачки синџири и отворената и кооперативна меѓународна средина“, рече тој.
Претседателот денеска пристигна во Ханој на почетокот на дводневната посета на Виетнам.
Иако патувањето на Шји веројатно беше планирано порано, тоа стана значајно поради тарифната војна меѓу Кина и САД, двете најголеми економии во светот.
Во Виетнам, Кси ќе се сретне со генералниот секретар на Комунистичката партија на Виетнам То Лам и премиерот Фам Мин Чин.
Текстот Кинескиот претседател: Нема победници во трговска војна е превземен од МАКФАКС.
