Рачно напишаните белешки пронајдени покрај телата на загинатите севернокорејски војници убиени на бојното поле во областа Курск во Русија откриваат ужасна тактика во која војниците на Пјонгјанг се користат како „мамка“ за соборување на украинските беспилотни летала.
Украинските сили за специјални операции пронашле белешки во кои војниците опишале смртоносни тактики и ја изразиле својата љубов кон нивниот лидер Ким Џонг-ун и копнежот да се вратат во својата татковина, пишува британски „Телеграф“.
На еден од цртежите од пронајдената тетратка се гледа како војник излегува за да го привлече вниманието на дрон, додека неговите двајца другари чекаат да го соборат.
„Кога мамката стои, дронот ќе застане и ќе биде соборен“, напишал војникот во своите белешки.
Детално е опишано како „човечката мамка“ треба да стои на седум метри од украинскиот дрон, кој потоа ќе биде „неутрализиран со прецизен удар“.
Воените набљудувачи и украинските команданти велат дека севернокорејските војници не се обучени за модерно војување и дека Русите ги користат како топовско месо, испраќајќи ги пеш преку отворени полиња, без артилериска поддршка, за да ја тестираат украинската одбрана, додека се придружувани од мали групи руски специјални сили.
Околу 4.000 Севернокорејци веќе се убиени или повредени, изјави во четвртокот украинскиот претседател Володимир Зеленски. Американските власти проценуваат дека само во последната недела од декември биле убиени повеќе од 1.000 војници од Пјонгјанг.
Рачно напишаниот дневник, кој беше пронајден на 21 декември, му припаѓал на млад војник кој загинал на фронтот заедно со двајца сонародници, соопштија украинските специјални сили.
Неколку дена претходно, украинските сили заробија двајца севернокорејски војници кои рекоа дека мислеле оти биле испратени во Украина на обука, а не на вистинска борба.
Зеленски му ги понуди заробените војници на Пјонгјанг во замена за украинските воени затвореници кои се држат во Русија, додавајќи дека Киев „сигурно ќе зароби повеќе севернокорејски војници“ во иднина.
Многу од илјадниците севернокорејски регрути испратени во Русија во октомври се уште биле тинејџери. Паднатиот војник чиј дневник бил пронајден на бојното поле во руската област Курск, опишал како му недостасувале родителите и како го прославил роденденот на својот колега.
„Копнеам по мојата татковина, откако ја напуштив топлата прегратка на моите драги татко и мајка, додека овде во Русија го славам роденденот на мојот најблизок другар Сонг Џи Мионг“, напишал војникот.
Неговиот дневник покажува и како младиот регрут бил длабоко индоктриниран и целосно лојален на севернокорејскиот диктатор Ким Џонг-Ун.
„Дури и по цена на мојот живот, без двоумење ќе ги извршувам наредбите на врховниот командант“, напишал младиот човек.
Според договорот за „взаемна воена помош“ потпишан со Владимир Путин минатиот јуни, Ким испрати околу 12.000 регрути да им помогнат на руските сили да ги протераат украинските војници од регионот Курск.
Во замена за војници и залихи на ракети и артилериски гранати, Путин наводно и испраќа гориво на Северна Кореја и му помага на Ким да лансира шпионски сателити.
Руските воени блогери велат дека војниците на Кремљ се обидуваат да ги истуркаат преостанатите украински воени единици од регионот Курск пред Доналд Трамп да положи заклетва како американски претседател на 20 јануари, по што би можел да се обиде да наметне мировен договор.
Текстот Белешките на мртвите севернокорејски војници откриваат ужасна тактика: „Човечката мамка треба да биде на 7 метри од дронот“ е превземен од МАКФАКС.
