Доналд Трамп вчера изјави дека повеќе нема повторно да дебатира со потпретседателката Камала Харис, додека нејзината кампања соопшти дека примила донации од 47 милиони долари во 24 часа откако тие се сретнаа за прв пат, во вторникот вечерта. Харис рече дека таа и Трамп им „должат на гласачите“ повторно да се пресметаат.
Како што пренесува Њујорк тајмс, неочекуваниот прилив на донации по дебатата за кампањата на Харис е најновиот знак за моментумот што таа го зазеде. Но, на помалку од два месеци до денот на изборите, истражувањата во државите на бојното поле предвидуваат многу тесен натпревар. Помошниците на Харис се подготвуваат за многу блиско „мелење“.
– Трета дебата нема да има, напиша Трамп на својата социјална мрежа „Трут социјал“ (Truth Social) по учеството на дебатата против претседателот Џо Бајден во јуни и Харис оваа недела.
„Кога борец ќе загуби натпревар првото нешто што го бара е реванш. Анкетите јасно покажуваат дека во вторникот вечерта победив во дебатата против мојата пријателка Камала Харис – кандидатка на радикалната левица на демократите. Таа веднаш повика на нова дебата“, напиша поранешниот претседател на својата социјална мрежа, обвинувајќи ја актуелната администрација за лошата состојба во државата.
Иако Трамп го пофали својот настап во вторникот, шест републикански донатори и негови тројца советници рекоа дека сметаат дека Харис победила во дебатата, најмногу затоа што Трамп не успеал да ги пренесе своите идеи и позиции.
Дебатата од пред три дена ја следеле 67,1 милиони гледачи. Според анкетата на Ројтерс/Ипсос, меѓу гласачите кои слушнале барем нешто за дебатата, 53 отсто сметаат дека Харис победила, а 24 отсто Трамп, додека анкета на ЈуГов покажува дека 54 отсто од анкетираните сметаат дека Харис е победник, а 31 отсто дека Трамп бил подобар.
Анкетата покажува и дека 54 отсто од запишаните гласачи сметаат дека една дебата меѓу двајцата била доволна, додека 46 отсто посакуваат уште една.
Откако Трамп објави дека нема да има нова дебата, претседателската кандидатка на Демократската партија и актуелна американска потпретседателка, Камала Харис, на партиски митинг во Северна Каролина, една од американските држави клучна за исходот од ноемвриските избори, синоќа изјави дека верува дека на гласачите им должи уште една дебата.
„Верувам дека им должиме на гласачите уште една дебата“, рече Харис на митингот.
Неколку анкети на јавното мислење покажаа дека Харис со својот настап го победи републиканскиот противкандидат Доналд Трамп во првата претседателска дебата, пренесува „Гласот на Америка“.
Резултатите од анкетата спроведена од Ројтерс / Ипсос покажуваат дека потпретседателката на САД и демократски кандидат за претстојните претседателски избори, Камала Харис, има мнозинска предност од 47 спрема 42 отсто пред поранешниот претседател на САД и републикански кандидат Доналд Трамп, .
Дводневната анкета покажа дека Харис има пет проценти предност меѓу регистрираните гласачи, малку над предноста од четири поени што ја имаше пред Трамп во анкетата на Ројтерс/Ипсос од 21 до 28 август.
Меѓу гласачите кои рекоа дека слушнале барем нешто за дебатата во вторникот, 53 отсто рекле дека победила Харис, а 24 отсто рекле дека победил Трамп. Околу 52 отсто од познавачите на дебатата рекле дека Трамп не постапил строго, додека 21 отсто го кажале истото за Харис. Меѓу републиканските гласачи, еден од пет изјавил дека Трамп не постапил грубо.
Истражувањето опфатило 1.690 возрасни Американци на национално ниво.
Неколку последователни анкети на Ројтерс/Ипсос покажуваат константно зголемување на предноста на Камала Харис во однос на републиканскиот противкандидат Доналд Трамп.
Според резултатите од анкета на Ројтерс/Ипсос објавени на 29 август, Камала Харис водеше пред Доналд Трамп со 45% спрема 41% , што покажа дека потпретседателката предизвика нов ентузијазам кај гласачите и ја раздвижи трката пред изборите на 5 ноември.
Предноста од 4 процентни поени меѓу регистрираните гласачи беше поголема од предноста од 1 поен што ја имаше Харис пред поранешниот претседател во анкетата на Ројтерс/Ипсос кон крајот на јули.
Драган Мишев
