Поранешниот британски премиер Риши Сунак денеска ја повика владата и нејзиниот претседател да ги разгледаат сите опции со цел да ги запленат замрзнатите руски средства за посилна поддршка на Украина.
Неговиот повик дојде откако американскиот претседател Доналд Трамп ја прекина воената помош за Украина, пишува британски „Сан“.
Сунак истакна дека ваквата одлука на САД уште повеќе ја нагласува потребата Европа да најде значително повеќе средства за помош на Киев.
Во обраќањето во Долниот дом на парламентот, тој посочи дека сега е време да се оди чекор понатаму и да се запленат руските средства.
Сунак ја повика министерката за финансии Рејчел Ривс да преземе координирана акција за да ги земе овие средства и да им ги даде на Украинците да ја бранат и изградат својата земја.
Ривс истакна дека е исклучително комплицирано да се преземе таков чекор за да се усогласи со меѓународното право, но дека владата ги разгледува сите опции бидејќи Русија треба да ја плати штетата што ја предизвикала.
Во исто време, британскиот министер за одбрана Џон Хили треба да ги посети САД подоцна оваа недела за да разговара со неговиот американски колега Пит Хегсет.
Во меѓувреме, шефот на британската дипломатија Дејвид Лами изјави дека имал добар телефонски разговор со американскиот државен секретар Марк Рубио за Украина, како и за прекинот на огнот во Газа.
Текстот Поранешниот британски премиер Сунак ја повика владата да ги заплени замрзнатите руски средства е превземен од МАКФАКС.
