Грчкото државјанство им е вратено на членовите на поранешното грчко кралско семејство, по повеќедецениски спор со владата, објавено е во владиниот службен весник.
Грција ја укина монархијата на референдум во 1974 година, а две децении подоцна на кралското семејство му беше одземено државјанството за време на спорот за поранешниот кралски имот кој беше под државна контрола, пренесе АП.
Во одлуката објавена во службениот весник на владата стои дека е вратено државјанството на 10 членови на поранешното кралско семејство.
Меѓу нив има пет деца на покојниот крал Константин II и поранешната кралица Ана-Марија, како и пет нивни внуци.
„Со длабоки емоции ја примивме веста дека по 30 години повторно имаме грчко државјанство“, се вели во соопштението на поранешното кралско семејство на грчки и англиски јазик.
Грчката монархија беше укината на референдум во декември 1974 година, кога гласачите со големо мнозинство го поддржаа републиканскиот устав, неколку месеци по падот на седумгодишната воена диктатура.
Членовите на кралското семејство живееле во егзил со децении пред Константин да се врати како приватен граѓанин во неговите 70-ти.
Ним им беше одземено грчкото државјанство во 1994 година за време на правната битка за поранешниот кралски имот, кој сега е во државна сопственост.
Тие претходно го одбија презимето Глуксбург, кое им беше доделено со закон од 1994 година, бидејќи сметаа дека тоа премногу ги поврзува со нивното германско потекло и ги прави помалку легитимни Грци.
По објавувањето на одлуката за државјанство во службен весник, членовите на поранешното кралско семејство ќе можат да аплицираат за лични карти и грчки пасоши.
Текстот Вратено државјанството на поранешното грчко кралско семејство: со децении спореа со државата е превземен од МАКФАКС.
