Најмалку четири лица загинаа, а над 100 се повредени во силниот земјотрес што вчера го погоди источниот дел на Јапонија, јави Си-ен-ен.
Advertisements
Како што пренесе телевизијата, еден од загинатите е маж на 60-годишна возраст, кој живеел во градот Сома, соопшти локалната канцеларија за спречување катастрофи.
Повредените од земјотресот се префрлени во болницата во градот Сома во Фукушима, јави јапонската агенција Кјодо, а напојувањето со струја во Токио е вратено во нормала.
Земјотресот, како што соопшти јапонската метеоролошка агенција, бил на длабочина од 60 километри. Првично беше соопштено дека бил со јачина од 7,3 степени, но властите денеска рекоа дека тој бил со интензитет од 7,4 степени според Рихтеровата скала.
Земјотресот го погоди брегот на источната јапонска префектура Фукушима, истото подрачје како и во 2011 година, кога потрес со интензитет од девет степени доведе до нуклеарна катастрофа во Фукушима.
По земјотресот во средата беше издадено предупредување за цунами за крајбрежните префектури Фукушима и Мијаги.
Јапонскиот премиер Фумио Кишида подоцна рече дека „не се откриени абнормалности“ во ниту една од нуклеарните централи во земјата.
