Единствената македонска партија во Албанија, Македонска алијанса за европска иднина (МАЕИ) ги повика Македонците да присуствуваат на вечерашната самостојна изложба на уметникот Генци Кадриу, Македонец со потекло од Голо Брдо.
-Изложбата ќе се одржи на денеска во Parking Art Gallery, во организација на Комитетот на националните малцинства и под покровителство на претставничката на македонското малцинство Марјана Костофски и потпретседателот Сеад Казанџиу, со поддршка на Македонската амбасада во Тирана, стои во објавата.
Се додава дека Генци Кадриу, кој потекнува од селото Требиште, област Голо Брдо, живее и работи во градот Фиер. Завршил високо образование на Академијата за ликовни уметности во Тирана во 1990 година.
Меѓу неговите познати дела е „Македонија“ – уметничко прикажување на главните личности од македонската историја, изработено врз основа на историски материјали и моделирани во глина.
– Не ја пропуштајте можноста да ја видите уметноста на Генци Кадриу и да го поддржите неговиот креативен израз, апелира МАЕИ.
Претходно и Македонското друштво „Илинден“-Тирана, чија мисија е заштита на македонскиот идентитет и култура, ги повика припадниците на македонското национално малцинство и сите љубители на уметноста, да дојдат и одблиску да ги видат делата на уметникот Кадриу.
Како што самиот Кадриу во една прилика кажа делото “Македонија” ја отсликува посветеноста на јазичното и културното наследство на неговото семејство, кое го вградил во комплементарното уметничко дело и оти „неговата поставка Македонија е рефлексија и на неговата посветеност на социјалните прашања, каде уметноста и културата ги обединуваат луѓето и народите“.
