Еврогрупата препорача Бугарија да стане 21-та членка на еврозоната од 1 јануари 2026 година, јавува БГНЕС, пренесува Трибуна.
На состанокот што се одржа во Луксембург, Бугарија беше претставена од министерката за финансии Теменушка Петкова и гувернерот на Бугарската народна банка Димитар Радев. Според Петкова, сите земји-членки на еврозоната едногласно ја поддржале кандидатурата на Бугарија, истакнувајќи дека земјата ги исполнува сите критериуми за членство.
„Денес е навистина убав ден за нашата земја. Сите едногласно рекоа дека Бугарија ги исполнува апсолутно сите услови за да стане дел од еврозоната“, изјави Петкова.
Во текот на состанокот беа разгледани и конвергентните извештаи на Европската комисија и Европската централна банка, а претставниците на овие институции дадоа позитивна оценка за подготвеноста на Бугарија.
Состанокот на Еврогрупата се одржа ден пред заседанието на Советот ЕКОФИН, кој ќе го донесе конечниот формален одлука за приемот на еврото на 8 јули во Брисел.
Претседателот на Еврогрупата, Паскал Донахју, изјави дека влезот на Бугарија во еврозоната ќе биде од голема корист за нејзината економија. Тој нагласи дека еврото веќе долго време успешно придонесува за одржување на ниска инфлација, дури и по ценовните шокови на енергетскиот пазар.
„Со правилна буџетска политика, верувам дека Бугарија ќе го совлада предизвикот и ќе придонесе за зајакнување на еврозоната“, додаде Донахју.
Со оваа одлука, Бугарија се доближува чекор поблиску до официјалното усвојување на еврото, што ќе значи нова етапа во нејзината економска и финансиска интеграција во Европската унија.
