Градоначалничката на Скопје, Данела Арсовска поднела иницијатива за враќање на името на улицата „Втора македонска бригада“, која пред неколку дена беше преименувана во „Адем Демачи“.
Одлуката, ја соопшти Арсовска преку социјалните мрежи:
Денес до Советот на град Скопје поднесов иницијатива за враќање на името на улицата „Втора македонска бригада“ која претходниот состав на советот ја променил во „Адем Демачи“, а за која Владата дала согласност за промена.
Ги повикувам сите советници во Советот на град Скопје да гласаат во корист на оваа предлог одлука, со која ќе се исправи неправдата кон повеќе од 230 херои, припадници на Втората македонска бригада од сите етникуми кои го дале својот живот за одбрана на Македонија.
Апелирам, оваа иницијатива да не се политизира ниту пак да се злоупотребува за кревање на етнички тензии, особено поради фактот што најголемиот дел од хероите, покрај Македонци биле токму Албанци, Роми и Власи.
Воедно, силно ја осудувам националистичката реторика и на Косовскиот премиер Албин Курти сакам да му предложам нова иницијатива – во Приштина улица да биде именувана по Македонскиот револуционер Тодор Александров кој своевремено активно соработувал Хасан Приштина, Хасан Бејта и Бајрам Цури во борбата против окупацијата на СХС. За оваа соработка е донесена и одлука на ЦК на ВМРО на која за контакт бил назначен Петар Чаулев.
