Целувките се најпознат десерт што кај нас може да се најде, а изработени се од шеќер и белки. Но, смесата од која се изработуваат во кулинарството се нарекува „меринг“ и може да се користи не само за вакви слатки, туку и за декорации на десерти

Честопати во рецептите наидувате на бели пувкасти слатки украсени со некој интересен крем или овошје, што не е изненадување со оглед дека станува збор за вкусен десерт. Тоа што е посебно интересно кај овие убави на изглед колачи, е нивната база, а тоа е т.н. меринг, од кој кај нас најчесто се приготвуваат целувки. Тоа е направено од мешавина од белки со шеќер и се користи за лесни слатки или за декорации на слатки од ронливо тесто. Иако мерингот се прави од само две состојки, многу е тежок за приготвување. Доволен е еден погрешен чекор и да ви пропадне целата работа. Има три видови меринг, а разликата е во начинот на кој им се додава шеќерот на белките.

Француски меринг

Обичниот и најпознат е францускиот меринг за кој белките (задолжително е да се на собна температура) не се обработуваат термички туку се матат белките во густа смеса, а потоа им се додава шеќерот. Додека се матат, шеќерот се топи и тие стануваат сè поцврсти. Користењето кристален шеќер е пресудно, бидејќи благодарение на него мерингот постигнува стабилност. Но, поради начинот на приготвување, францускиот меринг не е најстабилен, па слатките направени со оваа метода мораат брзо да се консумираат, бидејќи пенестата смеса во допир со влага брзо омекнува. Затоа препорачлива е за подготовка на воздушесто суфле.

Швајцарски меринг

За украсување пити или тартови идеален е швајцарскиот меринг, кај кој белките термички се обработуваат. Белките со миксер прво треба добро да се изматат, да се постигне што поголем волумен и постепено се додава шеќерот да стане смесата поцврста, па потоа се става садот со матени белки во сад на пареа и лесно се матат додека се варат на средна температура. Смесата постепено се загрева додека стане топла на допир. Текстурата на ваквиот меринг е многу нежна, но стабилна. Можете да ја обликувате како сакате, што е корисно особено ако приготвувате кори за торта.

Италијански меринг

Трет начин е италијанскиот меринг, кој се прави со шеќерен сируп. Тој се приготвува од шеќер со малку вода (колку да може да се стопи шеќерот) и се загрева на температура од 120 степени. Белките треба да ги ставите во сад и да ги изматите прво лесно на мала брзина, а потоа на поголема. Кога ќе се зацврстат, полека ќе им го додавате загреаниот шеќерен сируп. Улогата на сирупот е термичка обработка на белките. Со оглед дека температурата на сирупот е многу важна, добро е при готвењето да користите термометар. Смесата се миксира додека стане многу цврста и сјајна. Вака приготвениот меринг е многу стабилен и нема да омекне.