Барселона ќе бара нов спортски директор, откако Жорди Кројф ќе си замине од клубот на 30 јуни, и покрај тоа што тренерот Чави Ернандез јавно побара тој да остане при славеничката парада по освојувањето на титулата.

Кројф, синот на легендарниот Јохан Кројф, ќе си замине по две години на чело на тимот, и неговото заминување доаѓа две недели откако директорот на фудбал, Матеу Алемани потврди дека ќе си оди по крајот на летниот преоден рок.

Двете заминувања доаѓаат во незгодна ситуација за Барселона, со обвиненијата во случајот „Негреира“ и незавидната финансиска ситуација во каталонскиот гигант.

Се верува дека Алемани ќе биде заменет со поранешниот легендарен фудбалер на клубот, Деко, додека за Кројф засега нема најавена замена.

Прикажи повеќе