Четворица пациенти ја загубија битката со коронавирусот во штипскиот ковид центар. Портпаролот на Клиничка болница-Штип, Марина Шуманска информира дека двајца од пациентите се од Радовиш на возраст од 72 и 73 години, а другите двајца од Штип на возраст од 78 и 79 години. Пациентите имале и други здравствени проблеми, а тројца од нив биле и невакцинирани.

Инфектолозите велат дека есенскиот бран на делта сојот е карактеристичен што пациентите им доаѓаат во исклучително тешка состојба и веднаш се ставаат на постојана кислородна поддршка. Во моментов зависни од кислород се 44 пациенти, а во Инфективното и Кожно одделение има слободни по четири болнички кревети.

Само за пет дена во ковид – центарот битката ја загубија 13 пациенти, додека во рок од две недели вкупно 20, а 80 отсто од починатите се на возраст од над 60 години и се од речиси сите градови во Брегалничкиот регион.

Во штипскиот вакцинален пункт за четири дена со прва доза се вакцинирале вкупно 135 граѓани. Координаторката на вакциналниот пункт, Дијана Коцева-Миланова за МИА вели дека интересот за вакцинација е поголем кај граѓаните, кои ја примаат третата доза.

Станува збор за повозрасни пациенти, кои имаат примено две дози од кинеските вакцини, но имаме и интерес за бустер дозата и од здравствените работници и вработените во училиштата и градинките, вели Коцева-Миланова.

Забележува дека штипскиот регион е над државниот просек, досега со две дози се имунизирани над 35.000 граѓани, а трета доза имаат примено над 3.300 граѓани.

Republika.mk – содржините, графичките и техничките решенија се заштитени со издавачки и авторски права (copyright). Крадењето на авторски текстови е казниво со закон. Дозволено е делумно превземање на авторски содржини (текст и фотографии) со ставање хиперлинк до содржината што се цитира.