Северна Кореја пријави уште 269 510 случаи со симптоми на треска и уште шест смртни случаи, објавија денеска државните медиуми откако земјата го потврди првиот случај со ковид-19, соопшти државната агенција КЦНА, пренесува Ројтерс.

Според севернокорејскиот штаб за борба против вирусот, 56 лица починале, а повеќе од 1,48 милион се разболеле поради брзото ширење на треската во земјата од крајот на април.

Северна Кореја соопшти дека најмалку 663 910 луѓе сè уште се во карантин.

Државните медиуми не наведуваат за колку од случаите на треска е потврдено дека се случаи на коронавирус, а надворешни експерти сметаат дека повеќето од овие случаи се ковид-19.

Изолираната земја се бори со својата прва признаена појава на ковид-19, што ја потврди минатата недела, поттикнувајќи загриженост за голема криза поради недостаток на вакцини и соодветна медицинска инфраструктура.

Светската здравствена организација (СЗО) предупреди дека вирусот може брзо да се шири во Северна Кореја, која немаше програма за вакцинација и одби меѓународна помош.

Вчера севернокорејскиот лидер Ким Џонг-ун ѝ нареди на војската да ја стабилизира дистрибуцијата на лекови за коронавирус во главниот град Пјонгјанг, каде што за само неколку дена се пријавени повеќе од милион случаи на коронавирус.