Фудбалската репрезентација на Македонија ќе се соочи со селекциите на Бугарија, Грузија и на Гибралтар во новото издание на Лигата на нации за сезоната 2022/2023.

Селекторот Благоја Милевски вели дека групата е тешка, но дека Македонија ќе се бори за првата позиција.

„Групата е тешка, но во денешниот фудбал нема лесен противник, или однапред запишани бодови. Нѐ очекуваат сериозни натпревари. Грузија е репрезентација против која одигравме неизвесни натпревари во последниот период. Бугарија одигра нерешено против европскиот првак, Италија. Тоа значи дека нашиот противник бележи значителен напредок. Гибралтар се разбира дека не е истата селекција од првото издание на Лига на нации кога се соочивме во иста група. Македонија мора да биде на највисоко ниво на секој натпревар. Денешниот фудбал, едноставно не трпи поинаков пристап. Сѐ што ќе бараме од фудбалерите и целиот наш тим е максимално залагање на сите натпревари“, изјави Милевски.